من يومياتي

يوم قررت اقدم على الوظيفة .. حسبتها.. يوم بالتعليم العالي آخذ اوراقي و منها على الديوان. بس نسيت التعقيدات و السوالف اللي تصير هني. وصارتلي وايد شغلات و شفت اشياء عجيبة و قابلت ناس منطقها غريب و لو بكتب فراح يكون شي طويل وايد يتعب اصابعي و يدوخكم على الفاضي... فكفاية مثال بسيط ما قدرت اختصره اكثر

التعليم العالي أخروني على ما قدمت و قالولي مو لاقين اوراقي و لازم من اول و يديد السفارة اتدزهم و بتطول السالفة! و عقب ما نطرت شكثر انهم يدقون علي و يعبروني و بما انهم ماعندهم الا خط داخلي و ما نقدر ندق عليهم من برة على ذمة وحدة من الاخوات النشيطات في التعليم الدايخ..و بما ان كل ماروحلهم استفسر ارجع مثل ما رحت لان الموظفات كله ما يدرون.. قررت و توكلت اني اتأكد من مصدر ثاني..فدقيت من الكويت على السفارة في لندن علشان اشوف شنو وضعي في الكويت و اكدولي ان اوراقي دازينهم من شهر 12! فطبيت على التعليم العالي فجأة! الموظفة اللي قالتلي اوراقي مو دازينهم السفارة كانت مستأذنة و طالعة! احتمال رايحة شوبينج! فكلمت و حدة ثانية كانت قاعدة تشيك آخر صرعات الجنط على الانترنت. و يزاها الله خير دزت وحدة غيرها تدور بمكتب المستأذنة. و عقب ما قعدت الاخت تدور و تدور و تدور جان توقف فجأة و تطالعني... انتِ شسمج؟؟؟؟
انا:(لاااااااااااااااااااا؟ حلفي بس؟؟؟؟) فلانة الفلانية

الاخت:اهااا الفلانية
انا:(لااااااااااااااااااا؟ على منو كنتي قاعدة تدورين)؟
دورت و الا لقت اوراقي موجودة في مكتب الحلوة اللي مستأذنة.. نسختين و دازينهم من شهر12
و طبعا ختامها مسك لمن مسؤولة معادلة الشهادات اللي معتازة توقيعها مو مداومة و ماخذة اجازة قبل و خلال و بعد اجازة العيد الوطني اللي طاف! و طبعا قالولي رووحي نطري في بيتكم لين نتصل عليج و اذا ما اتصلنا لا تيين! فقررت بما انها اجازة ايي الاحد اللي عقب الاجازة سواء دقو او ما دقو
الاحد رحت..وين المسؤولة؟
اجازة
متى تيي؟
يمكن الاسبوع الياي!
عيل اوراقي ماخلصت؟
لحظة.. مبلة هذه ورقتج!
و عليها ختم و توقيع
هممممممم..... يعني مادام هالورقة النتفة هذه بتخلص بدون حضرة جناب معالي مسؤولة القسم.. ليش قلتولي روحي و سويتوها قصة؟ يعني لا مكانكم اقرب مكان و لا طريقكم اقرب طريق (بس طبعا مو بهل الاسلوب)ا
و الله مادري! هذه غلطة الموظفة اللي كلمتيها آخر مرة
هممم... انزين هذه الورقة اللي اقدمها للديوان؟ والا عادي اعطيهم نسخة منها؟
و الله مادري
همممم.... اوكي في شي ثاني لازم استلمه منكم بعد؟
والله مادري!
يعني منو يدري؟؟؟؟ انا ادري؟؟؟؟
انزين حبيبتي نبيج بس تييبيلنا طابع من مبنى رقم 2

نعم؟؟؟

للاسف مادري ليش بس هالطابع كان القشة اللي قصمت ظهر البعير

******************

و بعد جهود مضنية

و كفاحٍ مسلح

و غبار مكحكح

و سيحانٍ تحت شمس النضال المحرقة

و تفادي الشاحنات و التكاسي الجوالة

و زحمة الامة فوق جسر الغزالي

تم بحمد الله التعيين

و على الله نتوكل و به نستعين

على ما سنلقاه في وزارتنا المعطاء