يا ايها الشعب الكويس... السلام علييييكوووووو

يعني و الله .. على قولتهم.. شقووول شحجي شخلييي؟
يعني عندي أسئلة حاولت اقلبها براسي.. مالقييييييتلها اي عذر! من بوست سابق بينت علاقتي الحميمة مع احدى مستشفيات الكويت.. اليوم ببين علاقة اكثر حميمية مع مستشفى ثاني.. مركز مكي جمعة!!!!! الله لا يوريكم اياه

س. ليش لمن احد ايييييب مريضة للطوارئ و هي ترجف من الحرارة اللي حايشتها الدكتور يطالعها و يقول انا مو المسؤول هني و يمشي؟؟؟؟؟

طبعا كنت راح اقتله لوما الممرضة قالت انها قاعدة اتدق على دكتور الخفارة و اللي كان المفروض ايي على طوول ملبياً نداء مهنته السامية

س. ليش دكتور الخفارة مايرد لمن يدقون عليه 50 مرة بس لانه مبدل خفارته مع دكتور ثاني مو موجود اسمه على جدول الخفارات؟

يعني بدلت خفارتك... رد قوول منو الدكتور اللي بدلت معاه. طبعا اكيد كان قاعد يقز بالشوارع و معلق بالطو الدكاترة ورى بالسيارة علشان يثبت لكل الناس –مو للمرضى و العياذ بالله- انه دكتوور! يعني في شي اسمه احساس! 40 دقيقة يحاولون يدقون عليك... يعني اكيد في شي غلط! بس لااااااا.... مو مهم المريضة تقعد ترجف 40 دقيقة و اهلها جدامها يحاتونها.. المهم النظام يمشي و طالما ان هذا الوقت مو موعد خفارته فالمريضة و اهل المريضة لازم يحترمون القوانين

س. ليش الاوادم بغرفة الكيماوي (نفسها غرفة الطوارئ) ما يحترمون الارشادات؟

الارشادات كالتالي
ممنوع دخول غير المرضى لانخفاض مناعة المرضى فى الداخل

محطوطة على الباب الالمنيوم اللي من تشوفه تتحسر على هالديرة و مستشفيات هالديرة

طبعا هذا الشي الوحيد الموجود على الباب و اللي يدل على ان اذا الدخول ممنوع فمعناته ان اذا دخلتو للضرورة لبسو ماسك.. و اذا دخلتو فالتليفونات النقالة و رنات الرقاصات ممنوعة.. و الصوت العالي ممنوع.. و الاكل و بطاط الجبس بالذااااات ممنوووع.. اوكي هذي من عندي! بس يعني شفت العجب! اول ما دشيييينه اهالي بعض المرضى كانو موجودين محتلين بعض الكراسي الفاخرة في الغرفة! الغرفة اللي الواحد يحس انها قوطي سردين خصوصا لمن تمتلي بالمرضى! المهم.. واحدة( زائرة) ماشاء الله رن موبايلها و كانت حاطة رنة قرآآآن.. فقلت بقلبي ماشاء الله! صج وايد عالية و خرعتني بس هم احسن من الايقاع الشرقي اللي توة طلع.. فاااا و انا بعز مدحي الفكري و الخبص اللي انا فيه سمعتها ترد و.. يا بنت ال.. طوط.. ليش شاغله التليفون يا .. طوط.. طوط..طوط!!!! و بصوووت عااالييييييي و صراخ!!!! و الله اذا يييتلج رااااح اطقج طق و اطحن عظامج!!!!!!!!!!!!!!!!!!!!!!!!!!!! كل هذا بغرفة الكيماوي اللي ممنوع اصلا الدخوول فيها! كانت قاعدة تكلم بنتها! يعني انا الحين منحرجة و انا انقل هالحجي بس اعذروني لان من اللي شفته و الله! بس العالم فقدو الاحساس! يعني قاعدة بغرفة كلها مرضى يعانون من مرض خبيث .. وكلهم مصطرين على الاسرة و حالتهم حاله.. ما تقدرين تاخذين تيليفونج المحترم علشان تستقبلين مكالمتج المحترمة برة ؟ و الله امها اللي على السرير و حاطيلها درب و مافيها حيل رفعت راسها بالغصب و طردتها!! يعني اذيتي امج و المرضى اللي حولينج و اهلهم و بنتج اللي على التليفون و اتهزأتي على الفاضي! طبعا كل هذا صار خلال ال40 دقيقة اللي كنا ناطرين فيها دكتور ايي و يعطف عليييناااا

س. ليش لمن اخيرا ايي دكتور-وبحالتنا دكتورة- تدش منفسه مو عاجبها و توقف تسولف مع الممرضات و باجي المرضي الي مو يايين طوارئ و تهمل المريضة اللي حرارتها كانت ترتفع بالدقيقة و رجفتها ما كانت راضية توقف؟

يعني عرفنا يايبينج غصب لان مو خفارتج بس مالا داعي تنفسين جذي! و بعدين في شي اسمه اولويات! شوفي و مري على باجي المرضى.. بس لمن تخلصين من الطوارئ! كفاية حالتنا و اعصابنا اللي نتلفت واحنا ننطر. و الله انا بهاليوم مادري شلون مسكت اعصابي! يعني في اشياء وايد صارت بالمستشفى.. بس على قولتهم هذي كانت العناوين الرئيسية! والله اعصابي كانت فولاذية و ما تناجرت بس عشان لا ااذي امي و المرضى اللي حولينا.. فالكبت اللي صار كانت نتيجته هذا البوست.. و سامحوني على التحلطم

حقيقة

نظن نحن البشر بأننا سنعيش للأبد! نستيقظ كل يوم دون ادنى شعور باهمية هذا اليوم و الذي قد يكون آخر يوم في عمرنا. هل سألت نفسك يوماً عما كنت ستفعله لو علمت أن هذا آخر يوم في حياتك؟ ام انك تخاف مثل هذا السؤال؟ لنفترض انك تجرأت و فعلت.. ما كانت ستكون اولوياتك؟

الاسراع الى الصلاة اياً كانت ملتك؟ ادراك ما فات من وقت لم تقضه مع الاحبه؟ الاعتذار لشخص اسأت اليه في السابق لم يكن يستحق الاساءة؟ تعويض والديك بحنان لم يشهداه منذ زمن؟ الارتماء في حضن حبيب لم ينسك الدهر اياه؟
أكنت ستقيم حياتك بصدق؟ أكنت ستواجه نفسك بأخطائها قبل محاسنها؟ أكنت ستكون راضيا عما فعلته حتى الآن بحق نفسك و حق غيرك؟ هل تظن انك ستترك ذكرى طيبة في قلوب من حولك؟

لنسترجع شريط ذكرياتنا.. هل يستحق ذلك الأمر التافه كل ذلك الهرج و المرج ليفسد الود و يفرق بين الأحباب. هل كان ذلك الشيء الصغير يستحق كل ذلك التعظيم على حساب صحتك و علاقاتك مع البشر؟ هل كانت تلك الظروف قاسية حقا و لم يكن بامكانك الصمود في وجهها لتحافظ على ذلك الحبيب الذي لم تنسه يوما؟ أكانت تلك العراقيل عراقيلا بالفعل استحقت السماح لها بان تحول بيننا و بين ما نريد او من نريد او ما كان يجب بنا ان نفعل؟
الحياة غير مضمونة و قصيرة و ان طالت! و الفرصة الحقيقية قد لا تتكرر و قد تنتهي الحياة قبل تكرارها! و كل ما اتمناه الآن هو انتهاز هذه الفرصة متمنية ان لا يكون الوقت قد فات

فشة خلق

اليوم رحت ازور عمتي بمستشفى مبارك واللي صادف ان يتعالج فيها الشيخ سالم العلي( الله يقومه و يقومها بالسلامة). طبعا بغض النظرعن القمتة اللي حاشتني اول ما دشيت من (باب الطوارئ) لاني تذكرت الايام السوووودة اللي امي قضتها بمبارك الشهر اللي طاف, و بغض النظر عن حالة الحزن و ضيقة خلقي على عمتي اللي في غيبوبة و ما عندها لا زوج و لا عيال يجابلونها.. لا تشوفون حالتي و انا طالعة لمن شفت سيارات الرولز رويز و خواتها الكشخة واقفين جبال ( باب الطوارئ) و مسوين زحمة مع العلم ان هذا مدخل مخصص بس حق سيارات الاسعاف! وكان في سيارة اسعاف مسكينة متغلغصة بالغصب بين هالكشيخات و جنة اهي الضيفة و مو جنة هذا مكانها! الصراحة كنت مستعيلة و ماثبت اذا كان في مريض داخلها ولا اذا كانت واقفة زينة بس جذي ..بس الصراحة ما عجبني الوضع و قعدت اتخيل لو كنت مريضة و في حالة صحية دقيقة و يايبتني سيارة الاسعاف حق (باب الطوارئ) شبكون الوضع و هالسيارات الطوال العراض مسكرين الطريج؟؟؟؟؟ بكون داخل الاسعاف الفض انفاسي الاخيرة و حاسة ان الوضع مو طبيعي والكل مختبص

نعناعة: (بنفس مقطع) لا تق..ولوي حا....دث و ال....الطريج مسكر؟

رجل الاسعاف: لا اختي وصلنا بس ناطرين سايق طال عمره يوخر الرولزرويز عشان نقدر نوصل حق الباب

طبعاً على ما سايق طال عمره يوخر السيارة شوي شوي عشان لا ينخدش حياءها و صبغها اكون انا نافقة و منتقلة الى الرفيق الاعلى

يعني مع احترامي للكل بس في شي اسمه مصافط و في مداخل ثانية!! مدخل سيارات الاسعاف مخصص فقط لسيارات الاسعاف و اذا كلش كلش الواحد ملزم يدش من باب الطوارئ ففي مدخل ثاني للسيارات (حق باب الطوارئ) ملازم له و يمه كلش:\ يعني يا جماعة اسمه (باااااااااااااب طوااااااارئ)!!!!! حاطينة عشان يسهلون دخول المرضى و الحالات الخطرة!!!! يعني في هدف مو قشمرة!! من صجي احترييييييت!!!!!!!!! انا متأكدة ان مو كل الزوار (المهمين) جذي لان اكيد في من بينهم ناس تحترم قوانين و تعليمات بسيطة و مفهومة مثل تعليمات باب الطوارئ.. بس العتب على المخالفين

شي ثاني.... كل جم يوم يوصلني مسج انذار باقتراب القطع المبرمج.. انزين والله اتبعنا التعليمات! المكيفات وطيناها و سكرناها بالغرف اللي مانقعد فيها وايد! الليتات مسكرين اغلبها و مو لازم انور البيت كله! البيلرات وسكرناها لان اصلاً مانعتازها لان تسخينها من الشمس طبيعي! يعني قاعدين نحاول و نحاول و نحاول! اذا الدولة لي هالدرجة بتوفر طاقة.. سكرو المولات فترة الظهر عشان توفرون.. يعني الافينيوز اتوقع مسبب ثلث ازمة الكهرباء بالكويت! اوكي مو لي هالدرجة.. بس الصراحة اذا كان اقفال المولات في فترة الذروة يساعد فانا أؤيد هالشي.. يعنى ولا تنقطع الكهرباء عن البيوت!!!!! و اتوقع البيوت اللي كل ليلة تبطل ليتات حدايقها و ليتات الزينة اللي مبروزة الدرايش و البيبان و البيت بكبره لازم ينزلها انذار.. والا عشان بيوت فلان الفلاني و مايصير نجبرهم على اتباع مافيه مصلحة الدولة؟؟؟؟؟؟؟

مع احترامي للكل.. كانت هذي فشة خلق